עקסטאז ביי חסידי תולדות אהרן צום מסע קודש קיין ליזענסק פון האד' מתולדות אהרן אינאיינעם מיט תומכי המוסדות

מיטוואך פ' פנחס • י"ח תמוז תשפ"ד | בחצרות הקודש‎

מיט אן אומבאשרייבליכער התרגשות האבן חסידי תולדות אהרן אויפגענומען די בליציגע נייעס איבער א היסטארישע מסע קודש וואס כ''ק האדמו''ר מתולדות אהרן שליט''א גרייט זיך אונטערצונעמען קיין פולין, ביי וועלכע דער רבי שליט"א וועט ארויספארן מיט צענדליגער נדיבים בעם אויף א געהויבענער שבת באתרא קדישא ליזענסק סמוך ונראה צום ציון הק' פונעם הייליגן רבי ר' אלימלך מליזענסק זי"ע.

די רבי שליט"א וועלכע וויילט די וואכן אין מאד אונגארין אויף מנוחת הנפש וועט ספעציעל אפרייזן קיין פולין אויף דעם שבת מעין עולם הבא מיט די יחידי סגולה, נדיבי עם קודש פון אויסלאנד וואס לאזן זיך קאסטן סכומים עצומים צו קענען דעקן דעם יערליכן בודזשעט פון די מוסדות הקדושים תולדות אהרן בארץ הקודש, און וועלן האבן די זכיה מיטצוהאלטן די דאזיגע נסיעה ליהנות מזיו אורו פונעם רבי'ן שליט"א און מיטהאלטן א שבת אין ליזענסק בנהירו עילאה.

לויטן פלאן וועט די רבי שליט''א ארויספארן דעם קומענדיגן וואך ליל שישי פרשת מטות מסעי פונעם מקום הנופש אין אונגארין אויפן וועג קיין ליזענסק, די תפילות און טישן דורכאויס שבת וועלן געפראוועט ווערן אינעם בנין הכנסת אורחים סמוך ונראה צום ציון המצוינת - בעצם יומא דהילולא קדישא פון הרה"ק רבי אלעזר מליזענסק זי"ע בנו הגדול וברא כרעיה דאבוה פונעם הייליגן רבי ר' אלימלך זי"ע, די היסטארישע שבת וועט זיך שליסן מיטן גייסטרייכע סעודת מלווה מלכה מוצאי שבת ווי גאר א רייכע פראגראם איז צוגעגרייט. צומארגנס זונטאג ביום המסוגל ערב ראש חודש מנחם אב וועט פארקומען די מעמד תפילת רבים ביים ציון קודש הקדשים אין שפיץ פונעם רבי'ן שליט"א וואו מען וועט אויפרייסן די שערי שמים אין מעתיר זיין בתפילה לישועת הכלל והפרט, עס איז פארהאן א מעגליכקייט אז די רבי שליט"א וועט דערנאך ארומפארן צו די ארומיגע קברי הצדיקים אשר בארץ המה אין פולין, וויפיל די צייט וועט ערלויבן, מאנטאג וועט זיך די רבי שליט"א צוריק קערן צום מקום הנופש אין מאד אונגארין.