פייערליכע סעודת הודאה דורך האד' מטעמישוואר נאך ניסים גלוים זייענדיג פארמישט אין טראק-עקסידענט

מיטוואך פ' ויקרא • ד' ניסן תשפ"ה | בחצרות הקודש

בילדער קרעדיט: JDN

מיט גרויס שמחה און רגשי הוד האבן פילע חסידים ומעריצים מיטגעהאלטן די סעודת הודאה וואס איז היינט אפגעראכטן געווארן דורך כ"ק אדמו"ר מטעמישוואר שליט"א, וועלכער איז פארלאפענעם וואך אראפגעקלאפט געווארן ל"ע דורך א פארבייפארנדע טראק, און איז בחסדי שמים ארויס אהן קיין ערנסטע וואונדן ב"ה.

די סעודת הודאה איז פארגעקומען ברון שיר ושבח בבית מדרשו פונעם רבי'ן אין שטאט בני ברק, וואו א שיינעם ציבור אידן האבן מיטגעהאלטן די פייערליכע שעה'ן פון יודו לה' חסדו. אויפן אויבן אן האבן באשיינט, האדמו"ר מזלאטשוב א שוואגער מיטן רבי'ן, הגה"צ אבד"ק סערדאהעלי שליט"א, הגה"צ אבד"ק סטרעטין שליט"א און נאך רבנים חשובים.

דער רבי שליט"א האט זיך געוואשן צום סעודה און מ'האט געזינגען ווארמע ניגוני הודאה, דערנאך האט דער רבי געטרינקען לחיים און פארגעזינגען אודה, מיט א קול מלא רגש.

ביי די דברות קודש האט דער רבי געשילדערט די גרויסע ניסים וואס האט פאסירט ביים עקסידענט יענע וואך וואו ער איז בדרך נס - למעלה מדרך הטבע, אפגעקומען מיט בלויז לייכטע שמערצן, און זיך באדאנקט פאר אלע גוטע פריינד, ישראל קדושים, וואס זענען געשטאנען צו די האנט דורכאויס די תקופה בעצה ובמעש. די רבי האט אויך דערמאנט די היינטיגע הילולא פונעם הייליגן אפטא רב זי"ע און ארומגערעט כהכנה דרבה צום יום טוב פסח הממשמש ובא.

דער רבי האט געבענטשט ברכת המזון על הכוס, און דערנאך האט מען זיך ארויסגעלאזט אין א פייערדיגע טאנץ אויפ'ן ניגון חסדי השם כי לא תמנו, בהודאה על העבר ובבקשה על העתיד אז דער רבי שליט"א זאל גענצליך צוריקקומען צו די כוחות ויתחדש כנשר נעוריו און ווייטער קענען פארשפרייטן תורה וחסידות פאר אידן איבער די וועלט.