מונטאג פ' דברים - כ"ח תמוז תשפ"ג | קול בחצרות
דער טאג "כ"א תמוז", יומא דהילולא קדישא פון הרה"ק בעל פקודת אלעזר מפאלטישאן זי"ע, וואס איז געפאלן פארגאנגענעם מאנטאג פר' מטות מסעי, איז פאריבער מיט גרויס דערהויבנקייט און התרגשות דקדושה אין פאלטישאנער הויף אין בארא פארק, בצלו פון נכדו וממלא מקומו כ"ק אדמו"ר מפאלטישאן שליט"א.
אנגעהויבן פון זונטאג נאכט אור ליום כ"א תמוז, ביי מעריב, ביז אין די שפעטע נאכט-שעה'ן פון מאנטאג נאכט נאכ'ן עריכת השולחן וסעודת הילולא, איז געווען ווי א יומא אריכתא פון קדושה והתעלות. מען האט באשיינפערליך געשפירט א זכי' און א העכערקייט זיך געפינענדיג בבית מדרשו ובד' אמותיו 'במקום שהתפללו אבותי', דער מקום וואו דער בעל הילולא האט אפגעראכטן זיין הייליגע הימל'דיגע עבודה מתוך מסירות נפש עד יומו האחרון, ווען ער איז נסתלק געווארן אכט און פערציג יאר צוריק אין דעם טאג 'כ"א תמוז'.
מאנטאג אינדעפרי ביומא דהילולא קדישא איז זיך צוזאם געקומען א גרויסן ציבור חסידים ואנשי מעשה, ווען דער פאלטישאנער רבי שליט"א האט געדאווענט פאר'ן עמוד שחרית, און נאכ'ן דאווענען איז פארגעקומען א מסיבת לחיים לרגל די הילולא, וואו דער רבי שליט"א און עטליכע זקני חסידים האבן געשמועסט סיפורים ועובדות נפלאות פונעם בעל הילולא, הרה"ק בעל פקודת אלעזר זי"ע.
אנגעהויבן פון די גאר פריע שעה'ן אין טאג בעצם יומא דהילולא האבן געשטראמט א ריזן ציבור אידן פון איבער גאנץ ניו יארק און ספעציעל פון די קעטסקיל בערג, צום ציון הק' אין ניו דזשערסי, און מתפלל געווען לישועתן של ישראל.
אין ליכט פון די שווערע היצן פארגאנגענע וואך, איז דורך די פאלטישאנער קהילה אויפגעשטעלט געווארן א צייטווייליגן שאטער מיט פענ"ס ביים ציון, פאר די הונדערטער אידן וואס זענען ארויפגעקומען אין דעם טאג מתפלל זיין און אויסבעטן כל משאלות לבם ביים ציון הק', לרגל די יומא דהילולא.
שפעט נאכמיטאג איז כ"ק אדמו"ר מפאלטישאן שליט"א ארויפגעגאנגען צום ציון אינאיינעם מיט א גרויסן ציבור חסידים ואנשי מעשה און באלד אנגעהויבן זאגן די קאפיטלעך אלס שליח ציבור מיט גרויס התעוררות. דערנאך האט דער רבי שליט"א גענומען קוויטלעך פונעם גאנצן עולם, און זיך משתטח געווען על ציון זקנו הק' מיט גרויסע בכיות, אויסבעטנדיג ישועות ורפואות פאר כל בית ישראל.
פארנאכטס איז פארגעקומען דער גרויסארטיגער סעודת הילולא קדישא אינעם פאלטישאנער ביהמ"ד אין ב"פ, וואו ס'איז זיך צונויפגעקומען א ריזן ציבור פון הונדערטער אידן פון גרעיטער ניו יארק און פון קאנאדע, און שפיץ פון חשוב'ע אדמורי"ם ורבנים שליט"א. ביים טיש איז דער גאנצער עולם אריבער זאגן לחיים און דער רבי שליט"א האט דערביי גענומען די קוויטלעך פון די אלע אידן וואס האבן נישט געקענט אנקומען צום ציון הק'.
בשעת'ן טיש האט מען מכבד געווען כ"ק הגה"צ רבי משולם פייש גינזבורג שליט"א אדמו"ר מחוסט צו דערציילן זכרונות ועובדות, זייענדיג אן אייניקל פונעם בעל הילולא אין דאן איז געקומען דער הויכפונקט ווען דער רבי שליט"א האט משמיע געווען דברות קודש פאר א לענגערע צייט מענינא דיומא, און מעלה געווען זכרונו פון זקנו הק' דער בעל הילולא.
ביים אויספיר האט דער פאלטישאנער רבי שליט"א מיט גרויסע בכיות א לענגערע צייט אנגעוואונטשען ברכת קדשו פאר'ן גאנצן ציבור הנאספים, אז זכותו הגדול והקדוש פונעם זיידן דער בעל הילולא זאל מגין זיין מ'זאל אלע געהאלפן ווערן בבני חיי ומזוני, און בקרוב זוכה זיין צו די גאולה שלימה בהתגלות כבוד שמים במהרה.
זכותו יגן עלינו ועכ"י.
Comments