דינסטאג פ' ויקרא • ג' ניסן תשפ"ה | בחצרות הקודש
גאר געהויבן זענען די הרגשי קודש ביי תלמידי וחסידי קאשוי, נאכ'ן מיטלעבן דעם פארגאנגענעם וואך די ימי ההילולא קדישא פון רבם ומאורם הרה"ק בעל ברכות שמים מקאשוי זי"ע, בצל בנו וממלא מקומו כ"ק אדמו"ר מקאשוי שליט"א.
די ימי ההילולא האבן זיך פאקטיש אנגעהויבן מיט דעם שבת קודש בעפאר די יארצייט, ווען פילע תלמידי וחסידי קאשוי האבן מיטגעהאלטן די שבת הילולא אין דער קאשוי'ער הויף אין וויליאמסבורג, איבערהויפט ווען דאס יאר איז עס אויסגעפאלן אין דעם שבת פורים המשולש, פורים דמוקפין.
אין לויף פונעם שבת האט די רבי שליט"א יורד געווען לפני התיבה צו די תפילות פון קבלת שבת און מוסף, און עולה געווען מפטיר, אזוי אויך מוצאי שבת קודש האט די רבי שליט"א יורד געווען לפני התיבה צו תפילת מעריב.
שבת אינדערפרי נאכן דאווענען, איז פארגעקומען א גרויסע קידוש אין שפיץ פונעם רבי'ן שליט"א, ווי עס האט אויפגעטראטן מיט ערשטהאנטיגע זכרונות, הרה"ח ר' ישראל אליעזר קלאר שליט"א, משמש בקודש ביי דעם גרויסן בעל ההילולא זי"ע, דערנאך האט דער רבי שליט"א פארטיילט לעקעך פאר'ן ציבור און געוואונטשן לחיים.
מיטוואך ויקהל אויפדערנאכט ליל ההילולא קדישא, איז די רבי שליט"א ערשינען אין ביהמ"ד הגדול קאשוי אויף ספענסער סטריט אין וויליאמסבורג, וואו עס האבן זיך געהאט פארזאמלט א גרויסן ציבור חסידים ואנשי מעשה, צוערשט האט מען געדאוונט תפילת מעריב ווי דער רבי שליט"א האט יורד געווען לפני התיבה. דערנאך האט מען זיך געוואשן צו די סעודת הילולא, און דער רבי שליט"א האט מעריך געווען שולחנו הטהור לכבוד היום.
צוערשט איז פארגעקומען א סיום הש"ס און סיום ששה סדרי משנה וואס איז געלערנט געווארן לעילוי נשמת אדעם גרויסן בעל ההילולא, די רבי האט געזאגט דעם קדיש און געוואונטשן לחיים און ברכת קדשו.
דערנאך האט דער רבי שליט"א מכבד געווען דעם פלומעניק הגה"צ אב"ד סיקסא שליט"א וועלכע האט מעלה געווען זכרונות נפלאים פון די צייטן בהלו נרו על ראשינו, באגלייט מיט אינטערסאנטע מעשיות, עובדות, און הנהגות פאר א לענגערע וויילע.
דערנאך האט מען זוכה געווען צו הערן דברות קודש פונעם רבי'ן שליט"א, וועלכע האט שטארק ארומגערעדט איבער די געהויעבנע ענינים וואס מען האט געזען ביי דעם בעל ההילולא זי"ע בג' עמודי עולם, ובפרט די גרויסע התמדת התורה, און איבער זיין גרויסקייט אין מדות טובות, וואס דאס טוט באדייטן היינט צוטאגס פאר עדת צאן מרעיתו, תלמידיו הקרוים בנים, להדבק בדרכיו, אויספירנדיג די דברות קודש מיט ווארעמע ברכות לרוב פארן ציבור הנאספין. נאך די דברות קודש האט די רבי געבענטשט ברכת המזון על הכוס און דער גאנצע ציבור חסידים זענען אריבער וואונטשן דעם רבי'ן און נעמען כוס של ברכה.
אויפצומאגנס דאנערשטאג אינדערפרי, איז די רבי שליט"א אנגעקומען צו תפילת שחרית אין היכל הישיבה קטנה אהל רפאל קאשוי, וואו די רבי שליט"א האט געצינדן ליכט און צוגעגאנגען צום עמוד. נאך תפילת שחרית איז פארגעקומען א מעמד לחיים, ווי די בחורים האבן מסיים געווען ששה סדרי משנה. עס זענען געזינגען געווארן ניגוני התעוררות, און די רבי שליט"א האט משמיע געווען דברות קודש אויפפאדערנדיג דערביי די תלמידים צו מאכן די ריכטיגע הכנה איידערן ארויפגיין צום ציון הקדוש בעצם יומא דהילולא, און גלייכצייטיג דערמאנט די געוואלדיגע כח התורה פונעם בעל ההילולא, אויפברענגענדיג צווישן אנדערע ווי דער בעל ההילולא פלעגט לערנען אכצן שעה א מעת לעת, ווען אין די זעלבע צייט איז ער גאר שטארק נזהר געווען אין דעם ענין פון בין אדם לחבירו, און די מוסר השכל וואס דאס באדייט היינט פאר א קאשוי'ער תלמיד.
שפעטער נאכמיטאג איז די רבי שליט"א אנגעקומען אינעם היכל מבצר הכוללים, וואו דער רבי האט געדאוונט מנחה אינאיינעם מיט די אברכים לומדי הכולל, און עס איז פארגעקומען א מסיבת לחיים ווי די רבי שליט"א האט אויפגעטראטן מיט דברות קודש במשנתו הטהורה באגלייט מיט דברי הכנה איידערן עולה זיין לציון הקדוש.
ארום פיר דרייסיג נאכמיטאג האט זיך די רבי שליט"א ארויסגעלאזט אויפן וועג קיין קיין קרית קאשוי בעדפארד היללס, צום עליה לציון הקדוש. אויפ'ן וועג ארויף האט זיך דער רבי אפגעשטעלט און געגעבן א סכום צדקה פאר אלע גבאי צדקה.
דערנאך האט די רבי שליט"א געצינדן א לעכט ביי די ציונים פון אמו הרבנית הצדיקת ע"ה און פון אחיו בעל שיח חיים מקאשוי זצוק"ל, באזונדער האט די רבי שליט"א געצינדן מערערע ליכט ביי מקום מנוחתו פונעם בעל ההילולא, און דאן האט די גאנצע ציבור אינאיינעם געזאגט די קאפיטלעך תהילים פון ספר רביעי מיט גרויס התעוררות און השתפכות הנפש.
די רבי האט אויסגעלאזט מיט די יהי רצון איינרייסנדיג דערביי למען הכלל והפרט, און געהייסן מזכיר זיין דערביי די מנהיגי ישראל וועלכע זענען שרוי בצער, ווי דער קאלובער רבי שליט"א לרפו"ש און דער וויזשניצער רבי שליט"א לרפו"ש, דערנאך האט דער רבי געליינט קוויטלעך א לענגערע צייט און זיך משתטח געווען אויפן ציון, איינרייסנדיג מיט בכיות והתעוררות רב למען הכלל והפרט אויף דעם מקום המסוגל אין דעם אויסטערלישן עת רצון.
פון דארט איז מען צוגעפארן צום צענטראלן סעודת הילולא, וואס איז פארגעקומען אויף א גרויסע פארנעם אין היכל בית המדרש הגדול ד'קרית קאשוי, בראשות דעם רבי'ן שליט"א ואחיו הרבנים הגאונים שליט"א, ווי עס איז פארגעקומען די סיום הש"ס וששה סדרי משנה, מיט וועלכע עס איז מכובד געווארן הרה"צ ר' משה מנחם בלום שליט"א, אזוי אויך האט אויפגעטראטן מיט דבר זכרון צדיק הגה"צ אב"ד יעמרינג שליט"א,חדב"נ פונעם בעל ההילולא, און מיט ברכת המזון על הכוס האט די רבי שליט"א מכבד געווען אחיו הרה"צ ר' שמואל מאיר בלום שליט"א מקאשוי.
Comentários