מסיבת לחיים ביי האד' ממונקאטש צום ערשיינונג פון נייעם "הגדה אוצר פלאות התורה" דורך הרב וואלף זיכערמאן ראה"ק מונקאטש

דאנערשטאג פ' ויקרא • ה' ניסן תשפ"ה | בחצרות הקודש

בילדער קרעדיט: ארי פריינד, JDN

א באשיידענער מעמד "מסיבת לחיים" איז אפגעראכטן געווארן בביתו נאוה קודש פון כ"ק אדמו"ר ממונקאטש שליט"א, לרגל די הוצאה לאור עולם פון די נייע וועלטס-אויפגעכאפטע "הגדה של פסח – אוצר פלאות התורה", ארויסגעגעבן דורך הרבני הנגיד התורני ר' וואלף זיכערמאן ראה"ק דק"ק מונקאטש.

ביים מעמד האבן זיך באטייליגט הרבנים הגאוה"צ שליט"א קינדער פונעם מונקאטשער רבי'ן שליט"א, און ווי אויך די חשוב'ע אברכי הכולל פונעם כולל אברכים וואס דער נגיד ומחבר ספר האלט אויס, וועלכע זענען געקומען זיך משתתף זיין לכבודה של תורה ולכבודו פונעם פטרון הכולל.

אנהייב פונעם מעמד האט ר' וואלף זיך אויפגעשטעלט און געמאכט מיט גרויס רגש א "ברכת שהחיינו" האלטנדיג אין האנט די נייע הגדה, וואס ער האט דאן איבערגעגעבן פאר'ן רבי'ן שליט"א, וועלכער האט געבלעטערט און מעיין געווען דערין מיט א שטארקע הנאה און קורת רוח, און מעיר געווען פארשידענע ענינים אינעם רייכן תוכן דורכאויס די הגדה.

צום שלוס האט דער רבי שליט"א געוואונטשן לחיים און מאציל געווען פאר איש אמונו הנגיד ר' וואלף בעל אוצר פלאות התורה ברכות לרוב און דער זכות הרבצת התורה און מזכה זיין אלפי ישראל מיט'ן נייעם הפלא'דיגן חיבור זאל אים משפיע זיין כל ברכות האמורות בתורה.