אלפי חסידי וויזניץ ביי עצרת תפילה וסדר לימוד רבתי בשעת גורל'דיגע אפעראציע אין לאס אנדזשעלעס

מאנטאג פ' ויקהל • י"ז אדר תשפ"ה | בחצרות הקודש

בילדער קרעדיט: שוקי לרר

חסידי ויזניץ איבער די גארער וועלט זענען איינגעהילט אין א ערנסטן שטימונג, זיך גרייטענדיג צו די קומענדיגע קריטישע שעות ווען דער ראש העדה מרן אדמו"ר מויזניץ שליט"א איז ערווארטעט אדורכצוגיין א קאמפליצירטע אפעראציע אויפן אינעם ווייטן לאס אנדזשעלעס, און איז אנגעוויזן אויף רחמי שמים מרובים.

מטעם דער בית דין צדק אין קרית וויזניץ איז באשטימט געווארן א יום תענית פאר אלע וויזניצער חסידים צו פאסטן א האלבע טאג, די עלטערע אידן און קינדער, וועלן אויסלייזן דעם תענית מיט צדקה ופדיון נפש. באזונדער איז ארויסגעשטעלט געווארן די זמני המנינים צו זאגן תהלים אין אלע וויזניצע בתי מדרשים אויסצופועל'ן א גאנצע רפואה פארן רבי'ן. אין ביהמ"ד הגדול אין שיכון וויזניץ בני ברק זענען אצינד טויזנטער חסידים פארזאמלט, אברכי הכוללים און תלמידי הישיבות, אויסצוזאגן גאנץ ספר תהילים ברוב עם, נאכגעפאלגט מיט א סדר לימוד שעות רציפות בתענית דיבור, אמירת סליחות און י"ג מדות של רחמים.

אינעם אוהל אדמור"י ויזניץ בני ברק קומען פאר נאכאנאנדע משמורות תהלים דורכאויס די גאנצע טאג, און אין אלע שטיבלעך און מוסדות התורה דחסידי ויזניץ איבער די גאנצע וועלט וועט מען מתפלל זיין און מעורר זיין רחמי שמים. חסידי וויזניץ דרי צפון ארץ ישראל, וואס רעכנט אריין חיפה, צפת און עפולה וועלן ארויספארן אויף א מעמד תפילה ביים ציון הק' אין אתרא קדישא מירון. אין ירושלים וועט פארקומען א מעמד בקשת רחמים ביים כותל המערבי, אין די נאכמיטאג שעות בשעת די אפעראציע ביים רבי'ן.

פריער נאכמיטאג איז הגה"צ רבי חיים מאיר האגער אבד"ק קרית וויזניץ אנגעקומען אין באגלייטונג פון א עדה חסידים צום וויזניצער אהל וואו ער האט מיטגעהאלטן די משמורת תהילים און דערנאך מתפלל געוועהן ביי די ציונים הק' אויפן ארטיגן בית החיים, פונעם זיידן כ"ק אדמו"ר מטשערנאביל זצ"ל, מרן החזון איש זי"ע און דער שר התורה הגאון רבי חיים קנייבסקי זצ"ל שטייענדיג אויפצומארגנס פון זיין יארצייט. שפעטער נאכמיטאג האט דער רב שליט"א מיטגעהאלטן דער יום תפילה רבתי אין גרויסן ביהמ"ד אין קרית וויזניץ.

ווי אויך האבן זיך אנגעזעהן ביים עצרת אין ביהמ"ד הגדול אין בני ברק, דער מרא דאתרא הגה"צ רבי חיים יצחק אייזיק לאנדא גאב"ד בני ברק און הגאון רבי מסעוד בן שמעון די ספרדישע רב פון בני ברק, כ"ק אדמו"ר משבט הלוי שליט"א, הגה"צ רבי יעקב גרינוואלד מרבני ק"ק בעלזא בני ברק, הגה"צ רבי מנחם ארנסטר ראש ישיבת וויזניץ, און די קינדער און איידעמער פונעם רבי'ן שליט"א.