המון חוגג: גיגאנטישער בנין ישיבה קטנה אמרי חיים וויזניץ אין בארא פארק פייערליך באנייט קאמבינירט מיט הכנסת ס"ת

פרייטאג פ' ויקרא • ו' ניסן תשפ"ה | בחצרות הקודש

בילדער קרעדיט: אלי וואהל, JDN

מיט עקסטאזליכע שמחת הלבבות האבן הונדערטער חסידי וויזניץ אין בארא פארק די וואך מיטגעלעבט די פייערליכע מאורעות פון הכנסת ספר תורה און דערויף די חגיגת חנוכת הבית פאר די נייע בנין ישיבה קטנה אמרי חיים וויזניץ בנין לעבאוויטש וואס איז אפגעהאלטן געווארן בקול רינה ותודה והמון חוגג.

די גייסטרייכע מעמדי הוד האט זיך אנגעהויבן אין די פארמיטאג שעה'ן מיט א ספעציעלע מעמד פאר די תינוקות של בית רבן, וואו די העכער טויזנט תלמידי המוסדות האבן זיך פארזאמלט אין די זאל פון תלמוד תורה אמרי חיים, אין שפיץ פון כ"ק אדמו"ר מוויזניץ בארא פארק שליט"א וואס האט באשיינט די מעמד צו דער זייט פונעם חשובן נדבן.

אין די נאכמיטאג שעה'ן איז פארגעקומען די מעמד "סיום כתיבת האותיות" אויף די ספר תורה וואס הנגיד החסיד ר' בנציון לעבאוויטש הי"ו פטרון בנין הישיבה, האט אריינגעגעבן צום היכל הישיבה, לע"נ אביו הרב החסיד ר' יחיאל לעבאוויטש ע"ה מוותיקי העסקנים בחצר הקודש וויזניץ, ווען פילע רבנים ואנשים מכובדים האבן אריינגעשריבן אותיות אינעם ספר תורה, צווישן אנדערע האט זיך אנגעזעהן כ"ק אדמו"ר מוויזניץ וויליאמסבורג שליט"א און כ"ק אדמו"ר מוויזניץ ירושלים שליט"א.

ארום פיר אזייגער איז כ"ק אדמו"ר מוויזניץ בארא פארק שליט"א ערשינען אריינצושרייבן די לעצטע אותיות און דערביי מאציל געווען ברכת קדשו פאר'ן נדבן ובני משפחתו, דער רבי האט ארויסגעפירט די ספר תורה לרחובה של עיר אנגעכאפט מיטן נדבן וואו די תהלוכה איז באגלייט געווארן דורך מאסן חסידים זקנים עם נערים. אנקומענדיג פארנט פונעם נייעם בנין הישיבה, איז די רבי שליט"א ארויף אויף א הויעכע פלאטפארמע אינאיינעם מיטן נדבן ובני משפחתו און דארט אפגעראכטן ריקודין עילאין מיטן ספר פאר לענגערע מינוטן.

דערנאך האט דער רבי אריינגעפירט די ספר תורה אין ביהמ"ד, ווי די ריקודין האבן גובר געווען ביתר שאת ועוז, ווי די אנשים מכובדים פני העדה, בני משפחת המלוכה ובני משפחת לעבאוויטש הרוממה זענען מכובד געווארן צו טאנצן מיט די ספר תורה, בעת די רבי האט מעודד געווען די ריקודין בעוז ותעצומות, דערנאך האט דער רבי פארגעזאגט לדוד מזמור און מזמור לדוד חזן וקהל בהשתפכות הנפש, און דאן איז די גאנצע ציבור אראפ אין צענטער פון ביהמ"ד און געטאנצן א לענגערע צייט אויף די ניגונים פון 'האדרת והאמונה' כנהוג אום שמחת תורה, צום שלוס האט דער נדבן אריינגעפירט די ספר תורה להיכל השם.

נאך תפילת מנחה האט א פלאטע פון באסעס געפירט דעם ציבור צום עטרת גאלדא זאל ווי עס איז געפראוועט געווארן די סעודה לגומרה של תורה קאמבאנירט מיט די חנוכת הבית פונעם נייעם בנין.

אנהייב פונעם מעמד האט מען געהאט די זכיה לקבל פני קדשו פון רבי'ן שליט"א, די וויזניצער קאפעליע אין שפיץ פון די בעלי מנגנים ר' מאיר אדלער און ר' יענקי דאסקאל פון ארץ ישראל האבן מהנה געווען מיט פאסיגע ניגונים ושירי הודאה לכבוד המאורע, און די רבי שליט"א האט געמאכט א סיום אויף ששה סדרי משנה און געזאגט די קדיש לזכר נשמתו הטהורה פון זקינו הרה"ק בעל תורת מרדכי מוויזניץ זי"ע וואס די סעודה איז געווען מוקדש לזכרו שטייענדיג למחרת ההילולא קדישא, דערנאך האט דעם רבינס  ברודער הרה"צ רבי ישראל האגער שליט"א געמאכט א סיום און געזאגט קדיש.

די מעמד איז אויך באשיינט געווארן דורכ'ן רבינ'ס פעטער כ"ק אדמו"ר מוויזניץ בית שמש שליט"א וואס איז געווען צוגאסט אין ניו יארק לרגל די הילולא קדישא, און האט זיך ארויסגעלאזט אין א ריקוד נלהב מיטן נדבן און מיט בן אחיו דער רבי שליט"א, אויך האבן זיך אנגעזעהן די ברודער הגה"צ רבי חיים מאיר האגער אבד"ק קרית וויזניץ און הגה"צ רבי יעקב מרדכי האגער אב"ד וויזניץ אלעד בני מרן אדמו"ר מוויזניץ שליט"א, און די קינדער פון האחים האדמורי"ם לבית וויזניץ.

אין לויף פון די מעמד האבן אויפגעטרעטן מיט דרשות דער יושב ראש הרב יצחק שמחה כץ מגיד שיעור אין ישיבה, און הרב אהרן בעק ממנהלי המוסדות וואס האט ארויסגעברענגט די געוואלדיגע שמחה שהגענו עד הלום, און די רגשי הכרת הטוב פאר אלע עסקנים ונדבנים. דאן האט אויפגעטרעטן דער נדבן הרבני הנגיד רבי בן ציון לעבאוויטש הי"ו וואס האט ארומגערעט דברי זכרון אין אנדענק פון זיין פאטער הרה"ח ר' יחיאל ע"ה וואס סיי דער בנין און אזוי אויך די ספר תורה זענען נתנדב געווארן לעילוי נשמתו, דערביי האט ער געמאלדן איבער א פרישן פראיעקט פון אויפבויען א מייעסטעטישע בנין פאר די ישיבה גדולה 'תפארת מרדכי וויזניץ' אין סטעטן איילענד.

אויך האבן אויפגעטרעטן הרב מענדיל לוריא אן איידעם פונעם נדבן וואס האט ארומגערעט בשבחו פון זיין חשובן שווער מיט זיין פארצווייגטע פעולות במעשי צדקה וחסד, און הרה"ג ר' חיים שלמה טירנויער דומ"ץ וויזניץ בבארא פארק לאנגיעריגע חברותא פונעם נדבן.

אינעם קלימאקס האט מען זוכה געווען צו הערן די דברות קודש פונעם רבי'ן שליט"א, וועלכער האט מיט א קול רגש אפגעגעבן א שיר ושבח צו השי"ת שהחיינו לזמן הזה, און ארומגערעט במשנתו הטהורה פון זקינו הרה"ק בעל תורת מרדכי מוויזניץ זי"ע באגלייט מיט סיפורים ועובדות, דערנאך האט די רבי מאריך געווען בשבחו פונעם חשובן נדבן, אויך האט די רבי מעורר געווען דעם ציבור אנטייל צו נעמען בעין יפה אינעם מגבית 'קמחא דפסחא' אין די קהילה וואס ר' בן ציון איז טאקע דער בריח התיכון פון דעם קופה, און די רבי האט מסיים געווען מיט ברכת קדשו לרוב פארן גאנצן ציבור.

דערנאך האט מען געהערט הארציגע דברי חרוזין פון בדחנא דמלכא ר' שרגא ראזמאן. דער נדבן הנגיד החסיד רבי בן ציון לעבאוויטש הי"ו איז מכובד געווארן מיט ברכת המזון על הכוס, און מען האט זיך דערביי ארויסגעלאזט אין עקסטאזליכע ריקודין שליסנדיג די שמחה רוממה וואס מ'האט זוכה געווען מיטצולעבן.