דאנערשטאג חיי שרה • כ' חשון תשפ"ה | בחצרות הקודש
די וואך איז כ"ק אדמו"ר מלעלוב ניקלשבורג שליט"א אפגעפלויגן קיין אונגארן וואו דער רבי האלט זיך אויף אין שטאט קערעסטיר אויף מנוחת הנפש סמוך ונראה צום ציון הק' פונעם צדיק מפורסם הרה"ק ר' ישעי'לע קערעסטירער זי"ע. שבת האט דער רבי שליט"א אפגעראכטן אלע תפילות און טישן בביתו נאווה קודש אין רבי ישעי'לעס הויז אין קערעסטיר, מיט א באזונדערע רגש קודש האט דער רבי מעריך געוועהן דעם שולחן הטהור פרייטאג צונאכטס אינעם נאסטאלגישן מלוה מלכה שטוב. זונטאג אין לויף פונעם טאג האט דער רבי גענימען קוויטלעך פון די חסידים און געסט משתתפי השבת אין רבי ישעילע'ס קוויטל שטוב וואו די רבי האט פריער געצינדן ליכט מיט אן עבודה רבה און זיך דערביי אויסגעדריקט איבער די קדושת המקום "קידשה לשעתה וקידשה לעתיד לבוא" אז מ'קען דא פויעלן גרויסע ישועות.
אזוי אויך האט די רבי מתפלל געוועהן ביי די מקומות הקדושים אין אונגארין, אין אוהעל ביים ציון הרה"ק הישמח משה זי"ע, אין טשענגער ביים ציון הק' פונעם הייליגן מנוחת אשר, אין קאליב ביים ציון הק' פונעם הייליגן קאליבער זי"ע און אין ראצפערט ביים ציון הרה"ק רבי הירצקא'לע מראצפערט זי"ע.
Comments