דינסטאג פ' ויקרא • ג' ניסן תשפ"ה | בחצרות הקודש
אין די יעצטיגע טעג ווערן שוין געמאכט די אקטיווע הכנות צו די נסיעה התעוררות דורך כ"ק אדמו"ר מוויזניץ קייאמישע שליט"א קיין פוילן, אן אייגנארטיגע מסע הקודש לקדושים אשר בארץ המה אינאיינעם מיט תלמידיו היקרים בחורי ישיבה גדולה אין גיבערס, וואס וועלן האבן די זכי' צו מיטפארן אינאיינעם מיט'ן רבי'ן מעורר רחמים זיין למען הכלל והפרט.
די נסיעה ווערט צוגעשטעלט אלס אות הוקרה פאר די בחורים המצטיינים וועלכע האבן זיך לעצטע יאר באפלייסט מיט לימוד שעות רצופות, אלס הכנה צו די חתונה פונעם רבי'נס אייניקל, וואס איז פארגעקומען דעם לעצטן זומער אין ארץ ישראל, און ס'איז געווען אין פלאן אז די אלע בחורים וועלן באלוינט ווערן מיט דעם, וואס דער רבי וועט זיי מיטנעמען אויף די נסיעה צו די חתונה, אבער צוליב די מלחמה צושטאנד אין ארץ ישראל, ווען ס'איז נישט געווען א מעגליכקייט צו פארן אויף א גרויסן פארנעם, איז אפגעלייגט געווארן די באלוינונג, און אצינד אין די ימי בין הזמנים טוט עס דער רבי אפצאלן מיט'ן זיי מיטנעמען אויף די נסיעה למקומות הק'.
די נסיעה וועט זיך אנהייבן מיטוואך פרשת שמיני, און דער שב"ק פר' שמיני וועט אפגעראכטן ווערן אויף א געהויבענעם פארנעם בנהירו עילאה אין שטאט דינוב, סמוך ונראה צום ציון הק' פונעם הייליגן בני יששכר זי"ע צו וועם דער רבי שליט"א איז אדוק ומקושר, און זיינע הייליגע ספרים זענען שגור על לשונו אין יעדן געלעגנהייט. דורכאויס די נסיעה וועט מען פוקד זיין ביי די ציונים הק' אין רימנוב, קראקא, ליזענסק, לאנצוט. מוצש"ק וועט מען אנקומען קיין עיר הקודש צאנז, וואו מ'וועט האבן די זכי' פוקד צו זיין ביים הייליגן צאנזער רב זי"ע אין די דריי טעג פון די הילולא קדישא כ"ה ניסן. צומארגנס זונטאג תזריע מצורע וועט געשלאסן ווערן די נסיעה, ווען דער רבי בראש תלמידי ישיבתו וועלן זיך אהיימקערן למען קדשו אין גיבערס אנגעלאדנט מיט השפעות וישועות האבנדיג גע'פועל'ט אלעס גוטס.
Comments