דאנערשטאג פ' תולדות • כ"ו חשון תשפ"ה | בחצרות הקודש
בילדער קרעדיט: א. אייזנבאך
אין א שמחה'דיגע שטימונג און געהויבענע געמיטער האבן זיך חסידי שומרי אמונים מיטגעפרייט די וואך מאנטאג ביי די דערהויבענע שמחה בבית צדיקים, די שמחת האירוסין והתנאים בחצרות הקודש שומרי אמונים, פון הכלה בת זקונים פון כ"ק אדמו"ר משומרי אמונים שליט"א פון ירושלים מיט החתן הרב משה דוד שליט"א זון פון כ"ק אדמו"ר משומרי אמונים שליט"א פון בני ברק, וואס איז פארגעקומען אין די גרויסע היכל הטישן בחצר הקודש פינסק קרלין אין די בית ישראל געגנט אין ירושלים. לקול תרועות השמחה האט מען מקבל געוועהן די מחותנים האדמו"רים שליט"א ביים ערשיינען צום שמחה אינאיינעם מיטן חתן, וואו דער ציבור האט אויסגעבראכן אין ריקודין נלהבים ששים ושמחים בשמחת בית צדיקים, די שמחה כפולה פונעם סבא קדישא, הרה"ק בעל חוקי חיים משומרי אמונים זצוק"ל דער עומד משני הצדדים.
הנה מה טוב ומה נעים שבת אחים גם יחד, האבן מפאר געוועהן בראש השמחה די מחותנים כ"ק האדמו"רים משומרי אמונים שליט"א פון ירושלים און בני ברק און צו זייער זייט כ"ק מרנן האחים האדמו"רים משומרי אמונים שליט"א פון אשדוד און קרית גת, דער זיידע כ"ק מרן אדמו"ר מהאלמין, כ"ק האדמו"רים מפינסק קארלין, סטראפקוב, ביאלא ב"ב, זוועהיל, שאץ דרהאביטש, מיאלען, לעלוב ירושלים, דעעש ירושלים, דינוב, האחים האדמו"רים והרבנים מראדושיץ, הגה"צ ר' משה קאהן ראש ישיבת תולדות אהרן, הרה"צ ר' ישראל גולדמן מזוועהיל, און נאך פיל.
דער גאנצער מעמד איז באגלייט געווארן בפרקי שירה וזמרה דורך די שומרי אמונים'ער קאפעליע אין שפיץ פונעם בעל מנגן הרב ר' יהודה הערש פייג שליט"א וואס האט פארפאסט עטליכע נייע ניגונים לכבוד די גרויסע שמחה.
מיט קריאת התנאים איז מכובד געווארן דער זיידע כ"ק מרן אדמו"ר מהאלמין שליט"א און לקול מצהלות החסידים האבן זיך מרנן האדמו"רים ארויסגעלאזט אין א מחול לצדיקים.
נאך די דברות קודש פון כ"ק מרנן האדמו"רים שליט"א צום ערשט די זיידע האד' מהאלמין, און דערנאך די מחותנים האדמור"ים משומרי אמונים איז דער גאנצע עולם דורך אויף אמירת לחיים.
די שמחת החתונה איז באשטימט געווארן אויף חודש אלול דעם יאר אין שטאט בני ברק, בהשתתפות אדמורי"ם ורבנים און א ריזיגן ציבור חסידים ואנשי מעשה וואס גייען קומען זיך מיטפרייען ביי די גרויסע שמחה.
היום נכבד לבני אמונים
Comments