מיטוואך פ' תולדות • כ"ו חשון תשפ"ה | בחצרות הקודש
בילדער קרעדיט: י. שטיין
דעם מאנטאג האט כ"ק אדמו"ר מסאטמאר שליט"א אפגעשטאט די וועכענטליכע באזוך אינעם בית השחיטה המהודרת אין קרית יואל אינאיינעם מיט כ"ק אדמו"ר מסערדאהעלי שליט"א, וועם דער רבי האט געלאדענט צו קומען מפקח זיין ביי די שחיטה, וויילנדיג אויף א באזוך אין שטאט.
דער רבי איז ארום אינעם גאנצן בית השחיטה אין אלע אפטיילונגען פאר א לענגערע צייט און דערביי אנגעוויזן די פילע חומרות וואס זענען איינגעשטעלט אינעם בית השחיטה, האדמו"ר מסערדאהעלי שליט"א האט שטארק מפליא געווען די העכסטע מאס הידורים און חומרות אינעם בית השחיטה לזכות את ישראל המדקדקים בכשרות, און די אדמור"ים האבן א לענגערע וויילע נושא ונותן געוועהן בעניני שחיטה והמסתעף. נאך אריבער א שעה צייט האבן זיך די רבי'ס וארעם געזעגענט לשלום.
שפעטער באנאכט איז דער סאטמארער רבי אריבער אויף א ביקור גומלין ביי כ"ק אדמו"ר מסערדאהעלי שליט"א בבית האכסניא אין שטוב פון הרבני הנגיד ר' עקיבא הערש קליין הי"ו, עס האט זיך פארצויגן א שיינע שמועס איבער זכרונות פון אביו הגה"צ אבד"ק סאמבאטהעלי זצ"ל מיט הרה"ק מסאטמאר זי"ע.
Comments