פדה ה' את יעקב: הגה"צ רבי יעקב מאיר שעכטער רעכט אפ מיט מנין מקובלים "פדיון הרש"ש" לרפואת האד' מסקולען

דאנערשטאג פ' ואתחנן • י"א אב תשפ"ד | בחצרות הקודש

מיט פארכטיגע התעוררות רחמים איז נעכטן מיטוואך נאכמיטאג אפגעראכטן געווארן א זעלטענער מעמד עילאה "פדיון הרש"ש" בביתו נאוה קודש פונעם גדול המקובלים בדורינו כ"ק הגה"צ רבי מאיר שעכטער שליט"א, לרפואתו השלימה פונעם פאר הדור והדרו כ"ק אדמו"ר מסקולען שליט"א לרפו"ש.

דער מעמד הפדיון איז אפגעראכטן געווארן דורך א מנין מקובלים מנקיי הדעת בירושלים של מעלה, וועלכע זענען זיך צונויפגעקומען אין שטוב פון הגה"צ רבי יעקב מאיר שליט"א, מיט'ן השתתפות פונעם רבי'נס ברודער כ"ק אדמו"ר מסקולען ירושלים שליט"א, כ"ק אדמו"ר מפינסק קארלין שליט"א, כ"ק אדמו"ר מוויטעבסק שליט"א און נאך מקובלים.

דער פדיון איז אנגעפירט געווארן דורך הרה"ג רבי שרגא סעמיועלס שליט"א מרבני סאטמאר ירושלים, וועלכער האט אפגעראכטן דעם ספעציעלן תיקון ופדיון לויט'ן נוסח המקובל מיט די צוגעגרייטע מטבעות, נאכגעפאלגט מיט א מי שברך לחולה. נאכ'ן פדיון האט מען געזינגען דעם סקולענעם ניגון אויף 'נחמו נחמו עמי', און הגה"צ רבי יעקב מאיר האט מאציל געווען ברכת קדשו מעומק לבבו הטהור, פאר מרן ישעי' יעקב בן רייזל, אריכות ימים ושנים טובים, און דאן אין א זעלטענעם שריט אפגעשריבן א "מכתב קודש", וואו ער איז אין א בחינה פון צדיק גוזר מפציר כלפי שמיא פאר'ן רבי'נס אריכות ימים ושנים.

נאכ'ן מעמד הוד נורא האבן די מקובלים פארלאזט דעם ארט, און הגה"צ רבי יעקב מאיר איז פארבליבן מיט כ"ק אדמו"ר מפינסק קארלין שליט"א אויף די וועכנטליכע חברותא'שאפט ברזי תורה בתורת הנסתר.