אלפי חסידי וויזניץ געפייערט מעמד הכנה רבתי לקראת "ראש השנה לחסידות" י"ב שבט

מיטוואך פ' יתרו • י"ד שבט תשפ"ה | בחצרות הקודש

בילדער קרעדיט: יהושע פרוכטר

ברגשי עילאה ושמחה עצומה האבן אלפי חסידי וויזניץ זוכה געווען מיטצולעבן די גייסטרייכע שעה'ן של עונג רוחני ואמונת צדיקים ביים גראנדיעזן כינוס הכנה לקראת דעם גרויסן טאג "ראש השנה לחסידות" מארגן י"ב שבט, מאנטאג יתרו, וואס ווערט יערליך געפראוועט אויף א געהויבענעם פארנעם דורך חסידי וויזניץ וואס זענען זיך מחזק און משנן במשנתו הטהורה פונעם רבי'ן דער ישועת משה זצ"ל און בנו וממשיך דרכו כ"ק אדמו"ר מוויזניץ שליט"א.

דער מעמד איז פארגעקומען במוצאי יום גילה, זייענדיג א זמן קהלה לכל, מיט'ן השתתפות פון די גאנצע עדה הקדושה סיי די טויזנטער חסידים פון אלע שטעט ברחבי ארה"ק, און סיי די הונדערטער געסט פון אויסלאנד, כולם נקבצו באו לחגוג דעם יומא טבא בשיר ושבח לחי העולמים.

דער מעמד האט זיך אנגעהויבן מיט א רייכע סעודת מלוה מלכה לכל העם הנאספים, ווען בשעת מעשה איז אפגעהאלטן געווארן א גייסטרייכע פרעזענטאציע איבער'ן טעמע פונעם היי-יעריגן ראש השנה לחסידות, ארום די נושא פון שאיפה בתורה צוזאמען מיט התבטלות לצדיק, און ס'איז בטוב טעם ודעת אויסגעקלארט געווארן דורך די בעלי דרשנים און משפיעים בקרב הקהלה, אז דאס איז בכלל נישט קיין סתירה, נאר אדרבה, דורכ'ן התבטלות קען מען וואקסן בתורה און אויספירן די שאיפות מכח אל הפועל.

דערנאך איז דער רבי ערשינען אין זאל צו די פייערליכע שירה וזמרה דורכ'ן גאנצן ציבור. דער רבי האט זיך געוואשן צו מלוה מלכה און דערנאך איז אפגעהאלטן געווארן אן אייגענארטיגע ויכוח צווישן עטליכע אברכי הקהלה הקהלה איבער'ן דערמאנטן נושא, און דערנאך האט מען געהערט די ווארעמע ווערטער דורך הרה"ג ר' מאיר יעקב גרינפעלד שליט"א איבער'ן גרויסקייט פונעם טאג.

די קאפעליע האט מהנה געווען בשירה וזמרה און דערנאך איז געהערט געווארן מייסטערהאפטיגע חרוזים דורך עטליכע ילדי הפלא, און דאן האט מען זוכה געווען צו הערן די לענגערע דברי אלקים חיים פונעם רבי'ן שליט"א, וואס איז געווען איינגעטיילט אין דריי חלקים, דער ערשטער חלק מיט א שבח והודאה צו השי"ת אויף אלעס וואס מ'איז אריבער זינט דעם פארלאפענעם י"ב שבט, ווי אזוי מ'האט מיט אזא געוואלדיגע הצלחה זוכה געווען צו מרחיב זיין גבולי הקדושה באגלייט מיט געהויבענע נסיעות קיין אנטווערפן, אשדוד, אלעד, לעיקוואד און יעצט ממש אין לאנדאן.

דאן איז דער רבי אריבער רעדן איבער די יסודות וואס פארלאנגט זיך צו קענען ווערן אנגערופן א "חסיד'ישער יונגערמאן", און ווי די שאיפה פאר תורה ברענגט נישט קיין גאוה. אינעם דריטן טייל האט דער רבי ארומגעקאכט באש קודש זיך צו האלטן פעלזן פעסט אין די שיטה הקדושה פונעם ישועות משה, און זיך נישט דערשרעקן וואס 'די גאס' זאגט און פארקויפט, דער רבי האט זיך באצויגן צו די וואס שרייען אויף אונז אז מיר זענען 'עבודה זרה' וכדומה, און אויסגערופן בשער בת רבים אז וואס וויל וויסן דעם אמת זאל אריינקומען א שבת וכדומה, און זיך איבערצייגן אז די הייליגסטע אידן געפינען זיך דא, דא זענען דא די גרעסטע בעלי מידות, געוויסע זענען מוציא לעז און באשמוצן אז מיר זענען ווילד, מיר שלאגן, אבער אז איינער קומט אריין זעט ער אז דאס איז אלעס שקר, און מ'זאגט אזוי נאר פון קנאה ושנאה.

דער רבי האט ממשיך געווען מיט שטארק יסודות'דיגע הדרכות און התחזקות באמונה ובטחון, און אויסגעפירט מיט ברכות לרוב. נאכ'ן בענטשן, שוין נאך האלב דריי ביינאכט, איז דער רבי אריין אינעם זייטיגן צימער, וואו די געסט פון חוץ לארץ זענען אריבער זיך געזעגענען, און מ'האט ארויסבאגלייט דעם רבי'ן בשירה וזמרה.

אצינד גרייט מען זיך מחיל אל חיל צום גרויסן טאג י"ב שבט, וואס דער רבי וועט אפרעכטן מיט די גאנצע קהלה קדישא זקנים עם נערים, אנגעטון מיט בגדי שבת, וואס מ'וועט אינאיינעם דאווענען שחרית ביהמ"ד הגדול און דערנאך מעריך זיין א שלחן לחיים לכבוד היום.