מוצאי שבת פ' יתרו • י"ז שבט תשפ"ה | בחצרות הקודש
בילדער קרעדיט: א. אייזנבאך
הונדערטער אידן חסידים ואנשי מעשה האבן זיך נעכטן מיטגעפריידט ביי די געהויבענער שמחה בבית צדיקים, שמחת החתונה פון א אייניקל ביי כ"ק אדמו"ר מתולדות אברהם יצחק שליט"א, די חתן א זון פון בנו חביבו הגה"צ ר' ישראל קאהן שליט"א אבד"ק תולדות אברהם יצחק בארא פארק, מיט די כלה א טאכטער פון זיין שוואגער הרה"צ ר' משה יצחק כהנא שליט"א, זון פון הגה"צ רבי יעקב כהנא מספינקא מאנטשעסטער, חתן כלה אייניקלעך פון הגה"צ ר' דוד שווימער שליט"א דומ"ץ וויזניץ בית שמש.
די חתונה איז פארגעקומען ברוב פאר והדר אין די גרויסע אודיטאריום אין ביתר, מיט די באטייליגונג פון הונדערטער חסידים, און פילע געסט פון אויסלאנד וואס זענען געקומען זיך מיטצופרייען בשמחתו פונעם אבי החתן הגה"צ אב"ד תולדות אברהם יצחק בארא פארק.
ביים מעמד החופה איז דער געהויבענער זיידע כ"ק אדמו"ר מתולדות אברהם יצחק שליט"א מכובד געווארן מיט סידור קידושין, און מיט קריאת הכתובה איז מכובד געווארן דער פעטער כ"ק אדמו"ר מנחלת אהרן שליט"א, כ"ק אדמו"ר מוויזניץ בית שמש שליט"א איז מכובד געווארן מיט ברכות ראשונות, און דער זיידע הגה"צ רבי יעקב כהנא מספינקא מאנטשעסטער מיט ברכה אחריתא, נאכן חופה האט מען זיך ארויסגעלאזט אין א פייערדיגע מחול לצדיקים.
די סעודת החתונה איז געווען צוגעגרייט לכל הקהל הקודש אינעם גרויסן זאל, מיט גרויס שמחה האט מען מקבל געווען את פני הקודש מיט פרייליכע ניגונים, בעת די רבי שליט"א האט מעודד געוועהן די ריקודין בעוז ותעצומות, דערנאך איז דער רבי געטאנצן מיט די חתן און מחותנים.
נאכן זיך וואשן צום סעודה האט דער רבי געוואונטשן לחיים און איבערגעגעבן ברכת קדשו לכל הקהל הקודש, דאן האט דער רבי פארגעזינגען כבודו מלא עולם חזן וקהל, און מען אריינגעברענגט א גרויסן טאץ מיט פירות לכבוד ראש השנה לאילנות, ווען דערביי האט די קאפעליע געזינגען פילע ניגוני חמשה עשר בשבט און ניגוני ימים הנוראים.
בשעת די שמחה האבן זיך אנגעזעהן אויפן אויבן אן דעם רבינ'ס ברודער'ס האדמורי"ם ממבקשי אמונה, נחלת אהרן, הגה"צ ראש ישיבת תולדות אהרן, אזוי אויך הגה"צ רבי חיים מאיר האגער אב"ד קרית וויזניץ, הגה"צ רבי יעקבמרדכי האגער אב"ד וויזניץ אלעד בני מרן אדמו"ר מוויזניץ און הגה"צ ראש ישיבת וויזניץ שליט"א.
בדחנא דמלכא ר' פנחס גרינפעלד הי"ו האט געגראמט און אויסגערופן צוערשט דעם געהויבענעם זיידן כ"ק אדמו"ר מתולדות אברהם יצחק שליט"א וועלכער איז געטאנצן א לענגערע צייט בשלהבת אש קודש מיט איבערמידליכע כוחות, דערנאך האט מען געזונגען ניגוני התעוררות און דער רבי איז ווייטער געטאנצן מיטן חתן, און א באזונדערע ריקוד מיט בנו הגה"צ אב"ד תולדות אברהם יצחק בארא פארק שליט"א, און די מחותנים, דער רבי איז פארבליבן ביז נאך די מצווה טאנץ פון חתן כלה, נאך חצות הלילה.
Comments