מיטוואך פ' דברים • ג' אב תשפ"ד | בחצרות הקודש
בילדער קרעדיט: שמואל דריי
מאסן אידן בני ירושלים האבן נעכטן אנטייל גענומען ביים מעמד המרכזי סעודת הילולא לזכר נשמתו הטהורה פונעם מרא דארעא קדישא הגה"ק גאב"ד ירושלים זצ"ל בעל שערי טוביה ומרא דארעא דישראל, די צענטראלע סעודת הילולא צוגעשטעלט דורך די הנהלת העדה החרדית, איז פארגעקומען אין היכל ביהמ"ד הגדול וויזניץ אויף רח' אדוניהו הכהן אין ירושלים במעמד אלפי ישראל ועל צבאם מרנן ורבנן גדולי ישראל שרי התורה חברי ביד"ץ העדה החרדית, אדמורי"ם ורבנים וראשי ישיבות און פילע תלמידים פונעם ירושלימער רב זכר צדיק לברכה.
פאר לענגערע שעה'ן זענען די פילע משתתפים געזעסן און אויסגעהערט ווארימע און רייכע דרשות מפי אדמורי"ם ורבנים וחשובי העדה, וועלכע האבן אלע אייניג מעלה געווען זכרונו הבהיר פונעם בעל ההילולא, און זיין לעכטיגע ירושה וואס איז קאי וקיימא. מיט דברי פתיחה האט אויפגעטראטן דער משמש בקודש הרב חיים יהודה האלצמאן הי"ו, דאן האט בנו יחידו וחביבו פונעם רב ז"ל, הגה"צ רבי שלמה זלמן ווייס אב"ד שערי טובי' מסיים געווען מסכתא ברכות לעילוי נשמתו.
דאן האט אויפגעטרעטן המשפיע הגה"צ רבי אלימלך זילביגער שליט"א חתנא דבי נשיאה פונעם ירושלימער רב זצ"ל. און דערנאך האט מען געהערט ווארעמע דיבורים פון הגאון הגדול ר' יהודה פישער שליט"א חבר הבית דין צדק וועלכע האט ארויסגעברענגט די שלימות פונעם רב זצ"ל בשלושת עמודי עולם.
דערנאך האט דער זקן האדמורי"ם כ"ק אדמו"ר ממשכנות הרועים שליט"א משמיע געוועהן דברי ברכה, און א פייערדיגע דרשה איז געהערט געווארן פון מרן ראש הישיבה הגאון הגדול ר' יהושע דוד טורטשין שליט"א רב קהילות הפרושים, וועלכע האט בתוך דבריו משמיע געווען דברים חוצבים איבער די מערכה קעגן די לשכת הגיוס וואס איז אצינד עונד על הפרק. גאר הארציגע דרשות און זכרונות האט מען געהערט פון הגאון הגדול רבי אברהם יצחק אולמאן שליט"א חבר הביד"ץ, און פון תלמידו חביבו הרה"ג ר' משה בערגמאן וועלכע האט זוכה געווען משמש זיין בקודש פנימה רבות בשנים.
צווישן די פילע בני העדה החרדית, עסקנים ואנשי שם האט ספעציעל ארויסגעשיינט ביים יארצייט סעודה הרה"ח ר' שלמה יוסף וואלדמאן יו"ר קרן ההצלה וואס איז ספעציעל געקומען צופארן פון אמעריקא צום הילולא פונעם ירושלימער רב וואס האט בימי חייו אויפגעטון גדולות ונצורות פאר חינוך הבנים ובנות על טהרת הקודש.
Comments