כ"ק אדמו"ר מוויען שליט"א וועט האלטן יערליכע "ז' אדר דרשה" ליל שישי תצוה

מיטוואך פ' תרומה • כ"ח שבט תשפ"ה | בחצרות הקודש

דעם קומענדיגן וואך דאנערשטאג נאכט ז' אדר, יומא דהילולא פון משה רעיא מהימנא, וועלן זיך פילע הונדערטער אידן פארזאמלען צו הערן די "ז' אדר דרשה" אינעם היכל הבית המדרש דקהל עדת יראים וויען אין וויליאמסבורג, דורך דעם פום ממלל רברבן, כ"ק אדמו"ר מוויען שליט"א.

די דרשה ז' אדר, איז ווי באקאנט א מנהג מקדמת דנא פון די גדולי עולם אין אויבערלאנד, אז די רבנים און עיני העדה האבן זיך פארזאמלט מיט די קהילות הקודש און געזאגט א דרשה ביומא דהילולא של משה רבינו ע"ה, פול מיט דברי כיבושין און תוכחת מוסר וואט איז אנבאלאנגט דעם כלל און דעם פרט, ווי אויך דברי הספד אויף די אלע גדולי ישראל וועלכע זענען נסתלק במשך דעם פארלאפענעם יאר לגנזי מרומים.

און קהל עדת יראים וויען, פארזאמלען זיך אין דעם טאג די הונדערטער חברי הקהלה פון אומעטום, הקרובים והרחוקים, צו הערן די "ז' אדר דרשה" פונעם רב ומנהיג הקהלה. אין די לעצטערע יארן איז די ז' אדר דרשה פארוואנדלט געווארן, נישט בלויז פאר די חברי הקהלה עדת יראים וויען, נאר אלס א צוציאונגס פונקט פאר הונדערטער אידן וועלכע זיך צוזאם, צו הערן די טייערע דבורים פונעם רב שליט"א, וועלכער איז באקאנט אלס פה מפיק מרגליות און נואם בחסד עליון, ארויסצוברענגען די אלע ענינים הצריכים חיזוק בטוב טעם, בדברים היוצאים מהלב.

די דרשה איז איינגעטיילט אין דריי חלקים, דער חלק הדרוש, בביאורים נפלאים אין די פרשה פון די פטירה פון משה רבינו ע"ה, דערנאך ווערט אפגעראכטן דער "הספד" אויף די גדולי ישראל וועלכע זענען נעדר געווארן במשך דעם פארלאפענעם יאר, אויף וועלכע דער גאנצער ציבור זעצט זיך אויף דער ערד מקבל אבילות זיין און מ'זאגט פאר "קל מלא רחמים". דערנאך איז מען ממשיך די דרשה מיט ווארימע דברי מוסר און דברי התעוררות בענינים העומדים על הפרק, בדברים הצריכים חיזוק.

די דרשה וועט פארקומען אינעם בית המדרש דקהל עדת יראים וויען אין וויליאמסבורג יצ"ו, מען וועט דאווענען תפלת מעריב בשעה 7:30, און גלייך נאך מעריב וועט דער רב שליט"א אויפטרעטן מיט די דרשה. נאך די דרשה ווערט פארקומען די מסיבת לחיים דורך די חברה קדישא כנהוג מימי קדם ביום ז' אדר.