דאנערשטאג פ' דברים • ד' אב תשפ"ד | בחצרות הקודש
א שטראם פון שמחה'דיגע שפאנונג נעמט ארום אלפי חסידי ראחמיסטריווקא שפאנענדיג נענטער צום גרויסן טאג זונטאג עקב, י"ד אב, ווען ס'וועט בקול רנה ותודה המון חוגג געפייערט ווערן די גראנדיעזע חגיגה אדירה ומפוארה, "הנחת אבן הפנה", פאר די נייע גיגאנטישע יונגל קעמפ "מחנה אהל יוחנן" ראחמיסטריווקא אין עלענוויל.
עס וועט געבויט ווערן א שפאגל-נייער קעמפ, נעבן דעם עקזיסטירנדן קעמפ, ספעציעל געווידמעט פאר די הונדערטער תשב"ר פון כיתות ז' און ח', און איז געשאצט אפצוקאסטן די מעגא סומע פון "דרייסיג מיליאן דאלאר!", אויפצובויען שפאגל-נייע א פראכטפולע קעמפ, מיט אלע בנינים פאר תורה ותפלה און שלאף-בנינים, און אלעס ארום.
דער מעמד הנחת אבן הפנה וועט באשיינט ווערן אין שפיץ פון אלע ברידער כ"ק האדמורי"ם לבית ראחמיסטריווקא שליט"א, ובראשם דער נשיא המוסדות כ"ק אדמו"ר מראחמיסטריווקא שליט"א, אינאיינעם מיט אלע רבני ודייני הקהלה פון אומעטום, וועלכע וועלן מפאר זיין ביים מעמד הנשגב, וואס וועט מיטגעהאלטן ווערן דורך המוני חסידי ראחמיסטריווקא פון איבער גרעיטער ניו יארק און ניו דזשורזי וואס וועלן קומען צו פארן מיטלעבן די היסטארישע מאורע, און ווי אויך וועלן קומען צו פארן די תלמידי המוסדות וואס זענען אויפ'ן זומער אין שטאט.
אין די פארבליבענע קארגע וואך ביז'ן מעמד ווערן שוין געמאכט די העפטיגע אראנדזשירונגען אויף אלע פראנטן, מיט נאכאנאנדע געשפרעכן מיט די לאקאלע באאמטע פון עלענוויל, מסדר צו זיין אלע דעטאלן פאר'ן מעמד אדיר ומפואר.
Commentaires