חסידי אלכסנדר געשפאנט צום ביקור קודש פון האד' מאלכנסדר לרגל שבת חנוכת הבית פון נייעם אלכסנדר שטיבל אין בארא פארק

מוצאי שבת קודש פ' תרומה • א' אדר תשפ"ה | בחצרות הקודש

מיט געהויבענע געפילן און גרויס ערווארטונג גרייטן זיך חסידי אלכסנדר, און בפרט די חסידים תושבי אמעריקא צום לאנג ערווארטעטע מעמד חנוכת הבית פארן נייעם הערליכן בית החסידים אמרי מנחם אלכסנדר אין בארא פארק, ווען מ'גרייט זיך מחנך צו זיין דעם נייעם בית המדרש לשם ולתפארת, וואס וועט געפייערט ווערן ביי א שבת חנוכת הבית, און פרייליכע מאורעות אין די טעג ארום, קאמבאנירט מיט א התכנסות רבתי פון חסידי אלכסנדר איבער די וועלט, אין שפיץ פון מלכם ומאורם הוד כ"ק אדמו"ר מאלכסנדר שליט"א וואס וועט אונטערנעמען די נסיעה בטירחה דגברא רבה צו באשיינען די פרייליכע מאורעות און משפיע זיין מהודו פאר עדת חסידי אלכסנדר בארצות הברית.

די נייע בית החסידים ווערט אויפגעבויט אין די לעצטערע יאהרן מהמסד ועד הטפחות אויף די 49'סטע גאס און ווערט אצינד נתחנך ברוב פאר והדר לשמחת לב חסידי אלכסנדר אומעטום, דאס ביהמ"ד שטייט תחת נשיאותו הרמה פון כ"ק אדמו"ר מאלכסנדר שליט"א על ישראל הדרתו אין בני ברק, און שטייט אין שפיץ פונעם רב הקהילה הגה"צ ר' יוסף ארנסטר שליט"א.

אצינד צום פריידיגן מאמענט וועט מען האבן די זכיה לקבל פני קדשו פון רבי'ן שליט"א וואס וועט קומען צו פארן אינאיינעם מיט הונדערטער חסידים מעבר לים, צו פייערן די חגיגה. דער רבי שליט"א וועט ערשיינען בשערי העיר סוף וואך פרשת ויקהל, דאנערשטאג כ' אדר וועט פארקומען די מעמד קביעת מזוזה ביים נייעם ביהמ"ד, און די הויכפונקט וועט זיין די גרויסע שבת חנוכת הבית קאמבאנירט מיט א שבת התכנסות רבתית פון אלכסנדר חסידים די בכל אתר ואתר, די גאנצע שבת מבואו ועד צאתו וועט געפראוועט ווערן אינעם נייעם ביהמ"ד במקהלות עם רב תושבי העיר וואס וועלן אריינכאפן די געלעגנהייט לחסות בצל קדשו און זיך ווארעמען ביי די תפלות און טישן.

צומארגנס זונטאג וועט געפייערט ווערן די גרויסע חגיגת חנוכת הבית ברון שיר ושבח ובקול צהלה ורינה, אינאיינעם מיט די סעודת הילולא רבתי לרגל די יארצייט פון הרה"ק בעל אמונת משה מאלכסנדר זי"ע. אין די טעג דערויף וועט דער רבי זיך צוריקקערן אהיים למעון קדשו אין בני ברק, איבערלאזנדיג פילע השפעות טובות פאר אלע חסידים ומעריצים.