תורה תורה חגרי שק • ליטווישע תורה וועלט באוויינט הסתלקות פון המשגיח הגאון רבי מתתיהו סאלאמאן זצ"ל

דינסטאג פ' שמות • כ"א טבת תשפ"ד | בחצרות הקודש

תורה תורה חגרי שק והתפלשי באפרים, גלה כבוד מישראל, נצחו אראלים את המצוקים ונשבה ארון הקודש

מיט ערשיטערטע הערצער נעמט כלל ישראל אויף די שרעקליכע בשורה ארויס פון די עיר התורה והחסידות לעיקוואד, אז כבה נר ישראל, דער זקן המשגיחים בדורינו און שר התורה והיראה על פני כל ארץ הגולה, הגאון האדיר רבי מתתיהו סאלאמאן זצ"ל, איז נסתלק געווארן לגנזי מרומים, לדאבון לב כל בית ישראל איבער די גאנצע וועלט, אין עלטער פון איין און ניינציג יאר.

א שעה צוריק זענען די חברה הצלה אלארמירט געווארן אין א עמערדזשענסי רוף צום שטוב פונעם משגיח, נאך וואס דער משגיח האט געליטן א שווערע הארץ אטאקע רח"ל, נאכן ארבעטן א שטיק צייט מיטן האפענונג אויף גוטע בשורות, איז ליידער באשטעטיגט געווארן אז נשבה ארון הקודש, און מרן המשגיח האט צוריקגעגעבן זיין ריינע נשמה ליוצרה.

אבידה היא שאין לה תמורה, אוי לה לספינה שאבדה קברניטה, גאר שרעקליך איז די אבידה פאר די עולם התורה און די ליטווישע קרייזן, ווען עס איז אוועקגעריסן געווארן דער אדם הגדול בענקים אויף וועם יעדער האט ארויפגעקוקט, דער שר התורה וואס האט געטראגן על לוח לבו גאנץ כלל ישראל בכל פרטיה ודקדוקיה, און זיך געזארגט אויף די עתיד הדורות יעדע איינציגסטע טאג. דער איש על העדה וואס האט אויפגעשטורעמט כלל ישראל איבער די שרעקליכע סכנה פון טעכנעלאגיע, און דער גאון בתורה וואס האט אריינגעשיינט די כח התורה והמוסר אין טויזענטער טויזענטער תלמידים, סיי צווישן די פיר ווענט פון די גרעסטע ישיבה אין אמעריקע ישיבה בית מדרש גבוה אין לעיקוואד, און סיי איבער די גאנצע וועלט בכל מקום אשר דבר המלך ודתו מגיע.

עס איז נישט מעגליך צו באשרייבן די שרעקליכע חלל וואס פאסירט אצינד אין די עולם התורה והיראה, די שרעקליכע ווייטאג מיט וואס כלל ישראל ווערט ארומגענומען אין די יעצטיגע מינוטן. די ריזן מסע הלוויה וועט פארקומען מארגן מיטוואך ברחובות העיר לעיקוואד וכל מבואותיה, אין היכל בית מדרש הגדול בית מדרש גבוה, מער פרטים וועלן נאכפאלגן.

וכל בית ישראל יבכו את השריפה אשר שרף ה'.